واذا قصدك تهيني حشى لا انت ولا غيرك ولا عشره من أشكالك.....

عفا الله عن خطأ غدر الخناجر والضلوع ابطال ...
بسامح واتركك تحت الظلام الحالك لحالك

دخيلك وفر ادموعك ترى هدر الدموع اذلال...
وترى مافي أحد يصبرمثل صبري بغربالك

وإذا قلت أقطع احبالك تراني بقطع احبالك

عشان اكسب هدب عينك تجرعت العذاب اشكال ...
وليتك ترأف بحالي عشان ارأف ابحالك

مسوي في حياتي شئ ما يذكر ولا ينقال ...
حشى حتى العدو وهو العدو ما يعمل اعمالك

اتمسيني على الهم واتصبحني على الغربال ...
اتقلطني فناجيلك وتكسر عني دلالك

تحملت التعب لجلك وانا حملي يهد اجبال ...
رحلت من العذاب وما وقفت إلا على شانك

علامك كل ماجيك امتواضع جيتني تختال ...
معاك إلى متى بصبر وصبري منك يحلالك

مثل ما اقبلت لعيونك لزوم اتردلي بقبال ...
ومثل ما قد حشمتك حس واحشم قلبي اشوالك

انا محدن ابجابرني اساير معك هالمنوال ...
ترى لاني تبيعن لك ولاني بصغر اعيالك

انا جيت اعشقك نبض ومشاعر ما اعشقك تمثال ...
انا جيت اسكنك وأحياك وابقى فيك وابقالك

أنا جيت بضمى عاشق تعب يطرد سراب اللال...
انا جيت استفز ارضاك من فرقاك وألجألك

انا ما همت بك عاقل انا كنت اعشقك بخبال ...
أنا ما كنت احبك حي انا كنت اعشقك هالك

تخيل من كثر ما اخاف تلقى ل الزعل مدخال ..
أخاف اخطي على طيفك وادوس برجلي اضلالك

تبعتك والعرب تتبع رعود البارق الهمال ...
وأنا شفت المطر يتبعك في حلك وترحالك

كأن إلي خلق حسنك خلقني مع جسدك اضلال ...
وصرت اقرب جسد يمشي معك بقفاك واقبالك

أبي قلبك يحس انه فقد بمحبته رجال ..
ملكته من هدب عين وخسرت ارضاه بهمالك

صحيح ان الفراق أقسى ولكن الوصال امحال..
وأنا صعب علي ارضى غرورك واضعف اقبالك

بعد ماحققت عيني افبعدك لرقاد أمال ...
أعود للسهر ياخوي فال الله ولافالك

ببدل نظرتك فيني وجيلك كل يوم بحال ...
بكون اقرب من ثيابك عليك ولاتهيالك

بلمك وانثرك واجمعك وارجع وأنثرك بهمال ..
بخونك وازعلك وارضيك وازعل منك وارضالك

ابرسم بالثرى وجهك وابدفن صورتك برمال ...
ابشكي للعرب فرقاك وأضحك عند عذالك

ابهديك الوصال افراق واهديك والفراق اوصال ...
بسوي مثل ما اشوفك اتسوي وأفعل افعالك

عشان تعرف من فينا الزعول ومن وسيع البال ...
ابيك اتذوق فنجاني وانا بذوق فنجانك

نصيحه واحتفظ فيها قصر معك الزمن أوطال ...
أبي تسمع كلامي زين وتحطه على بالك

إذا حبك اهبال اطفال لك عندي اهبال اطفال ...
ولا وابشر بعد بهبال حب ماهو بهبالك

وإذا قصدك تهين اسمي عشان اتشمت العذال ...
حشى لا انت ولا غيرك ولا عشره من أشكالك